Surat Penudi Nuju Nuan...

..

The original piece of this "Last letter to Dadi" was written in English by me and the Iban version was translated by NagaMit @ Aunty Doris and Indai Dom...thank you so much for being crazy and sentimental together with me. Nagamit read it beautifully...nyabak nuan sulu...minta ampun...nyau enda bajik mua nya neh...maya malam penudi bala kami ngintu niang 18th December, 2009.
Minta ampun nyema tusun jaku engau leka iya enda betul...
Tu munyi iya...

Sulu ti ku sayau,
Pink Panther aku
Nyau baka ribut nuan datai nanya aku suba
Tang maya nuan pegi ninggal ke aku, enda berasai...
baka angin lemai ari
Nuan madah anang nyabak
Di saut aku..auk meh sulu
Taja pia...aku dah ngasa ke ati nuan
Ukai di enda nemu
Nadai pengelantang enggau penyamai beserara enggau pangan diri...
Lebih agi enggau orang ti di kesayau...

Sulu ...
Maya aki ninggal ke kitai suba, nuan meh pengering aku
Tang sapa meh nyadi pengering aku diatu, lebuh nuan ngejang ninggal ke aku enggau bala anak

Nuan ngajar aku jalai ngidup kediri, diau dalam pengerindu nitih ke gaya diri empu, mesti kering serta nemu
ngatur pendiau diri lalu nemu mela bala anak tua
Nuan selalu ngajar enggau ngelalau aku dalam semua utai
Lalu aku deka ngenggam jaku nuan nya sampai aku mati

Sulu tiap kali ku meda mata ari padam iya deka ngingat ke aku ke nuan
Ingat aku Sulu...maya nuan ngasuh aku madah ke pengerindu aku ka nuan maya tua berubat ba Normah Hospital, Kuching
Ko nuan...aku ka ninga nuan nyebut nuan sayau ke aku

Tu meh iya...semampai rindu ke nuan
Nya meh pengidup aku, bekejang ari diatu sampai aku betemu enggau nuan baru ila..

Aku deka nampung pengawa nuan
Ti selalu nulung orang ti seranta
Aku deka ngiring bala anak tua
Nitih ke niat enggau juluk ati nuan
Aku seruran deka nitih ke semua jaku, pengawa,penemu nuan dalam pengidup
Nya meh sulu..
Pink Panther aku
Belabuh ari diatu
Tua deka diau dalam dunia,jam enggau adan ti enda sebaka, enda begulai
Tang pengerindu aku tetap meruan baka mula tua ke baru nanggam pengerindu suba
Aku besemaia deka mela anak tua sulu enggau pengabis ati ku, awak ke sidak iya semampai kering,mujur baka pengidup nuan empu...

Sulu
Enda ku nemu nusun ke leka jaku sebana ati aku...
Tang nuan ngelala aku, nemu sapa aku...nyangka nya kebuah nuan ninggal ke aku dulu enggau semua utai tu
Ingat nuan sulu lebuh tua ke betundi enggau panggan diri...sapa entara tua ti tau dulu pegi...
Aku selalu madah ka juluk ati ngagai Allah Taala ngambi aku dulu pegi ari nuan
Laban aku nemu aku enda ulih nerima semua tu, nyema aku dudi ari nuan
Tang nuan selalu ngelaban jaku aku...
Nuan madah aku tetap ulih...
Auk meh sulu...
Munyi ko jaku nuan nya meh
Tetap kering enggau besemangat ketegal anak tua ke di tinggal nuan pegi

Aku meri terima kasih ke nuan ti udah ngiring,nyukung serta meransang aku dalam semua utai
Dalam pengidup tua ti dah begulai enggau pangan diri, pengawa aku ngelama tu
Nuan meri aku penemu,ngelalau aku ngambi ke semua utai tau mujur
Nuan selalu muji pengawa aku
Nuan seruran mesan aku ngerja semua pengawa engau pengerindu serta enggau pengabis ati..

Tang diatu nama meh penyadi aku diatu
Nuan nadai agi begulai sejalai enggau aku
Pengasai aku diatu nyau baka layang-layang putus tali
Nyau nadai penuju

Sulu enggau tu pemeri aku ke nuan semina nyaup nuan pulai
Nuju jalai ti meruan
Pulai asuh Allah Taala enggau penuh pengerindu nuju Ia
Terima kasih ke penyerah nuan
Terima kasih ke nuan ti ngemendar ke Tuhan Jesus merintah dalam ati nuan
Terima kasih ke nuan ti udah nyerah ke diri ngagai Indai Maria
Terima kasih ke nuan laban nuan udah ngemaruh ke diri lala semampai sayau nyentuk nuan mejam ke mata
Terima kasih ke nuan ti ngasi ke jaku Allah Taala lalu nerima peneka iya
Ketegal tu, nuan nyadi ke tugu dalam pengarap aku
Terima kasih ke lima bulan ti udah lalu ti penuh enggau pengerindu enggau pengingat ti cukup menyana
Aku nadai ngasai ke pemerinsa sereta pemedis maia ngintu enggau ngibun nuan
Aku semina ngasai ke diri likun lalu di intu enggau mentas...semua tu ari kuasa Allah Taala.
Nya meh ke tanda enggau pengerindu IYA ke kitai...
Terima kasih ke kaban blayan ke udah di beri sereta di anjung nuan, sidak tu meh malaikat nuan
Malaikat nuan ti deka ngintu serta ngemata ka kami menyanak
Terima kasih ke Hari Valentine ti penudi iya sereta pemeri nuan
Nuan udah mayuh kiruh enggau pengambis ati ngerami pengawa nya begulai enggau kaban bukai

Pengerindu aku tetap meruan belama
Baka nuan ti udah sayau ke aku sekumbang tua ke begulai
Nganti meh penatai aku ila sulu
Aku besampi nuan nyedia ke endur ke kitai menyanak di menua syurga
Lalu ngemata ke kami
Tu meh nyadi pengering kami

Bye Dadi,
Sulu Ati Aku,
Pink Panther Aku
Tu ukai pemarai ti nyerara tua sulu
Semina awak ti udah cukup nuan pulai dulu
Lalu ukai penembu pengawa
Kami seruran lelengau ke nuan dalam semua pengawa
Nuan meh mata ari tumbuh
Nuan meh mata ari padam dalam pengidup aku kenyau ari diatu
Sampai seput aku padam ila

Love you
Judy